Ташкилотимиз октябрь–ноябрда ҳар бир ходимга қишлоқ хўжалиги маҳсулотларини сотиб олишга ЭКИҲнинг 11 баравари миқдорида моддий ёрдам тўлайди. «СБХ»нинг 10.02.2011 йилдаги 6-сонида чоп этилган жадвалга кўра қишлоқ хўжалиги маҳсулотлари учун моддий ёрдамга даромад солиғи, ЯИТ ва ижтимоий бадаллар солинмайди. Ушбу қоида бугун ҳам амал қиляптими?
Бош бухгалтер.
– Ташкилот ходимларига моддий ёрдам тариқасида қишлоқ хўжалиги маҳсулотларини бериш ёки уларни сотиб олиш учун маблағлар бериш тарзидаги тўловлар бошқа даромадлар жумласига киради (Солиқ кодексининг (СК) 178-моддаси). Солиқ даври учун ЭКИҲнинг 12 бараваригача миқдорда тўланган суммага даромад солиғи (СКнинг 179-моддаси), ягона ижтимоий тўлов ва суғурта бадаллари солинмайди (СКнинг 307-моддаси).
2012 йил охиригача солиқ солинмайдиган моддий ёрдам ҳисоб-китоби учун йил охирига белгиланган ЭКИҲдан фойдаланилган. Бироқ 2013 йил бошидан жорий йилнинг 1 январида амал қиладиган ЭКИҲ қўлланяпти (25.12.2012 йилдаги ЎРҚ-343-сон Қонун 4-моддасининг 5-банди билан киритилган ўзгартиришлар билан бирга СКнинг 186-моддаси). 2013 йилда моддий ёрдамнинг имтиёзли суммаси 955 080 сўмни (79 590 х 12) ташкил қилган, 2014 йилда 1 153 260 сўмга (96 105 х 12) тенг бўлади.
Қишлоқ хўжалиги маҳсулотларини олишга тўланган суммалар йил мобайнида кўрсатилган моддий ёрдам миқдорига киришини ҳисобга олинг. Агар сиз ходимга «картошка учун» 11, ўғлининг тўйига 10 ЭКИҲ берган бўлсангиз, ЭКИҲнинг 9 баравари суммаси имтиёзли лимитдан ошади ва унга қонун ҳужжатлари билан белгиланган тартибда солиқ солинади.
Ноила МУҚМИНОВА,
экспертимиз.