Менинг вазиятимда ёрдам берсангиз. Мен Самарқанд шаҳрида туғилганман, бутун умр Ўзбекистонда яшадим. Қарийб ярим асрни ёш авлодни тарбиялаш ва ўқитишга бағишладим.
Ҳозирги вақтда пенсиядаман. 64 ёшга кирганман, гипертония касалига учраганман, ёнимда кимдир бўлишига муҳтожман. Ўғлим Россия фуқароси, мен у ернинг иқлимига мослашишга уриндим, бироқ мослаша олмадим. Самарқандда бирорта қариндошим қолмаган, Тошкентда эса ягона туғишган синглим яшайди. Мен унга яқинроқ жойга кўчиб келишни, турар жой сотиб олишни хоҳлайман. Бироқ олдимда Тошкентда яшовчи бўлишга имкон бермайдиган бир талай тўсиқлар пайдо бўлди.
Маълум бўлишича, мен турар жой сотиб олиш ҳуқуқига эга эмас эканман, чунки бу ерда доимий пропискада эмасман. Синглим оиласининг тиқилинч аҳволда яшаши уникида яшашимга имкон бермайди.
Менинг қуйидаги саволларимга жавоб берсангиз:
Мен мазкур вазиятда турар жой сотиб олиш ва пропискадан ўтишга ҳақлиманми?
Синглим кейинчалик ҳадя қилиш йўли билан мен учун турар жой сотиб олиши мумкинми?
Агар мен вақтинча прописка қилинсам, қандай муддат мобайнида Тошкент шаҳрида доимий пропискага эга бўлишим мумкин?
Ўзимнинг қариндошлигим ва соғлиғим ҳолатини тасдиқлаш учун қандай ҳужжатларни тақдим этишим керак?
Л.Геворкян.
– «Тошкент шаҳри ва Тошкент вилоятида доимий прописка қилиниши лозим бўлган шахслар – Ўзбекистон Республикаси фуқаролари тоифаларининг рўйхати тўғрисида»ги Қонун (14.09.2011 йилдаги ЎРҚ-296-сон) ва Ўзбекистон Республикаси фуқароларини Тошкент шаҳри ва Тошкент вилоятида доимий прописка қилиш тартиби тўғрисидаги йўриқномага1 мувофиқ Рўйхатнинг 4-бандига тўғри келадиган шахслар – меҳнатга қобилиятсиз бўлган ҳамда ўз оиласи бўлмаган туғишган ака-ука ва опа-сингиллар – Тошкент шаҳрида ўзларининг туғишган ака-ука ёки опа-сингиллари доимий прописка қилинган уй-жой майдонига доимий прописка қилинишлари мумкин. Улар кириш-чиқиш ва фуқароликни расмийлаштириш бўлимига қуйидаги ҳужжатларни тақдим этадилар:
ИИВ белгилаган шаклда ариза;
Ўзбекистон Республикаси фуқаросининг паспорти;
турар жой учун ҳужжатларнинг нотариал тасдиқланган нусхалари;
уй-жой мулкдорининг (мулкдорларининг) турар жой майдони бериши тўғрисида нотариал тасдиқланган аризаси (розилиги);
туғилганлик тўғрисидаги гувоҳноманинг нотариал тасдиқланган нусхалари;
ота-онанинг вафот этганлиги тўғрисида гувоҳнома ёки суднинг уларни вафот этган деб топиш тўғрисида ҳал қилув қарорларининг нусхалари;
меҳнатга қобилиятсиз деб топилган, ўз оиласига (эр (хотин) ва болаларга) эга бўлмаган вояга етган туғишган ака-ука ва опа-сингиллар охирги яшаш жойидаги ФҲДЁ органларидан уларда эр (хотин) ва болалар йўқлиги тўғрисида маълумотнома ёки Молия вазирлигининг тиббий-меҳнат эксперт комиссиялари (ТМЭК) томонидан берилган маълумотномани тақдим этадилар;
прописка учун давлат божи тўланганлиги тўғрисида квитанция;
прописка тўғрисидаги маълумотларни киритиш учун уй дафтари ёки квартиралар бўйича карточка (16-сон шакл).
Сиз Тошкентда прописка қилингандан кейин бошқа масалаларни ҳам муваффақият билан ҳал эта оласиз.
1Ички ишлар вазирининг АВ томонидан 4.05.2012 йилда 2358-сон билан рўйхатдан ўтказилган буйруғи билан тасдиқланган.
Санжар ХЎЖААҲМЕДОВ, эксперт-юристимиз.
