Бошқарув компаниямизнинг иши бизни қониқтирмаяпти. Биз унинг таркибидан ўз уйимизни чиқариб, умумий мол-мулкни ўзини ўзи бошқариш асосида, юридик шахс ташкил этмасдан бошқаришни йўлга қўймоқчимиз, бу қонунларда кўзда тутилган. Биз умумий йиғилишда шундай қарор қабул қилдик, унда яшовчиларнинг имзолари билан бошқарув компаниясига топширдик, бироқ БК ходимлари бизни қўйиб юборишни исташмаяпти. Улар уйни бошқариш билан боғлиқ ҳужжатларни, аҳолининг пул маблағлари қолдиғини бермаяпти. Айтишларича, ҳозирда ККУни бошқаришнинг фақат битта усули ўрнатилган – бу БК. Аслида ҳам шундайми? Қайси ҳужжатда уй тўғрисидаги техник ҳужжатларни топшириш назарда тутилади ва бизда ККУни бошқаришнинг нечта усули мавжуд?
– «Кўп квартирали уйларни бошқариш тўғрисида»ги Қонуннинг 8-моддасига мувофиқ кўп квартирали уйларни бошқариш учта усулдан бири орқали амалга оширилиши мумкин:
• бевосита жойларнинг мулкдорлари томонидан (кўп квартирали уйни бевосита бошқариш);
• юридик шахс бўлган бошқарувчи ташкилот томонидан ёки жисмоний шахс (якка тартибдаги тадбиркор) бўлган бошқарувчи томонидан шартнома асосида;
• уй-жой мулкдорларининг ширкати – битта ёки зич жойлашган бир нечта кўп квартирали уйда турар жойларнинг ва яшаш учун мўлжалланмаган жойларнинг мулкдорларини бирлаштирувчи нотижорат ташкилот.
Қонуннинг 28-моддасида назарда тутилишича, бошқарувчи ташкилот ёки бошқарувчи кўп квартирали уйни бошқариш шартномаси бекор қилинган кундан эътиборан уч иш куни ичида кўп квартирали уйнинг техник ҳужжатларини ва уйни бошқариш билан боғлиқ бошқа ҳужжатларни, қолдиқ пул маблағларини, умумий мол-мулк таркибига кирадиган жойларнинг калитларини ҳамда кўп квартирали уйдан фойдаланиш ва уни бошқариш учун зарур бўлган бошқа техник воситаларни ҳамда асбоб-ускуналарни янги танланган бошқарувчи ташкилотга ёки бошқарувчига ёхуд умумий йиғилиш қарорида белгиланган кўп квартирали уйдаги жой мулкдорига топшириши шарт.