Давлат хизматлари портали палапартиш ишламоқдами?
my.gov.uz порталидаги оилалар тўғрисидаги маълумотларга мувофиқ Ўзбекистонда аҳоли сонининг ўсиши геометрик жиҳатдан юксак даражага етиб бўлди деган хулосага келиш мумкин. Фойдаланувчиларнинг кўпчилигида аслида мавжуд бўлмаган ота-оналари, ака-укалари, опа-сингиллари сони шунчалик кўпайиб кетганки, бундан ҳайратда қоласиз. Ҳақиқий қариндошлар тўғрисидаги маълумотлар эса шунчалик хато берилганки, бундан йиғлаш ёки кулишни, қандай йўл тутиш кераклигини билолмайсиз. Кўп сонли қариндошлар қаердан олиб ёзилганлигини ҳеч ким тушунтириб бера олмаяпти. Маълумотлар аниқ берилмаганлигининг сабаби нимада, нима қилиш керак, қандай оқибатлар юзага келиши ва бундай қариндошлардан қандай қутулиш мумкин деган саволларга аниқ жавоб йўқ. Аммо бир нарса аниқ: бу чалкашлик – Давлат хизматлари порталига маълумотларни тақдим этадиган турли идораларнинг чидаб бўлмайдиган даражадаги саводсизлиги, эътиборсизлиги ва масъулиятсизлиги оқибатидир, ресурсдаги камчиликлар эса унинг ижрочиларининг профессионаллик даражаси етарли эмаслигидан далолат беради.