МҲХСга ўтган корхоналарга қандай счётлар режаси зарур
Молия вазирлиги тамоман янги тузилма ва счётлар рақамланишига эга бўлган МҲХС бўйича Счётлар режаси лойиҳасини муҳокама учун эълон қилди. Бухгалтер ва аудиторлар миллий уюшмаси экспертлари уни диққат билан ўрганиб чиқишди ва бухгалтерларга яхши маълум бўлган «Хўжалик юритувчи субъектлар молиявий-хўжалик фаолиятининг бухгалтерия ҳисоби счётлари режаси ва уни қўллаш бўйича Йўриқнома» 21-сон БҲМС (АВ рақами 1181, 23.10.2002 й.) негизида Счётлар режасининг муқобил вариантини тайёрлади. Улар халқаро стандартларга асосан ахборотни ошкор этиш учун зарур бўлган қўшимча счётларни киритган ҳолда, одатдаги тузилма ва рақамлашни сақлаб қолишди. Ўз БАМУ экспертлари айнан бундай Счётлар режаси халқаро ва миллий стандартлар бўйича счётлар маълумотларининг солиштирилишини таъминлаши мумкин деб ишонишади. Бу МҲХСга анча равон ўтиш ва МҲХС бўйича бухгалтерия ҳисобини юритиш мақсадида автоматлаштирилган дастурларни қайта созлаш харажатларини минималлаштириш имконини беради.