МҲХС бўйича намунавий счётлар режаси

Молиявий ҳисоботнинг халқаро стандартлари бухгалтерия ҳисобини эмас, балки ҳисоботни шакллантириш қоидаларини белгилайди. Бу бухгалтерия ҳисоби тизими уларда қандай шаклланганидан қатъи назар, барча мамлакатлар учун уларни универсал қилади. Шунинг оқибати ўлароқ, МҲХСда ҳам мажбурий, ҳам тавсиявий бухгалтерия ҳисоби счётлари режаси ҳақида ҳеч нарса айтилмаган. Улар ҳисобот кўрсаткичларини ўз ичига олади, корхона қайси счётлар режасидан фойдаланиши эса – корхонанинг ихтиёридаги иш. Асосийси, пировардида счётлардаги маълумотлар «Молиявий ҳолат тўғрисида ҳисобот» ва «Жами даромад тўғрисида ҳисобот»нинг тегишли сатрларига тушиши лозим. Бундай ёндашувнинг барча ижобий жиҳатларига қарамай, у муаммолар туғдиради, тавсиявий тусдаги намунавий счётлар режаси мавжуд бўлса, уларни ҳал қилиш осон бўлади. Молия вазирлиги МҲХСга ўтган корхоналар учун Намунавий счётлар режасининг лойиҳасини тайёрлади. У нима учун зарурлигини молия вазирининг ўринбосари Дилшод СУЛТОНОВ тушунтирди.