1 июнь – Халқаро болаларни ҳимоя қилиш куни муносабати билан Давлат божхона қўмитасида болажонлар учун очиқ эшиклар куни ташкил этилди.
Қўмитанинг Ҳарбий сафарбарлик, фавқулодда вазиятлар ишлари ва жанговар тайёргарлик бўлими томонидан ташкил қилинган мазкур тадбирда Тошкент гарнизони ҳудудида хизмат қилаётган божхона органлари ходимларининг фарзандлари иштирок этди.
Дастлаб 8 ёшгача ҳамда 9-12 ёшдаги болалар ўртасида шахмат мусобақаларига старт берилди. Ақл гимнастикаси бўйича беллашувлар давомида болажонларнинг жиддий нигоҳлари ва шахмат тахтасидаги дадил юришларини кўриб, уларда ҳозирданоқ эртанги ҳаётга нисбатан ишонч ва қатъият, ўз олдига аниқ мақсад қўя олиш каби кўникмалар шаклланаётганини кузатиш мумкин эди.
Мусобақа ғолибларига медаль, диплом ва эсдалик совғалари тантанали равишда топширилди.
Шундан сўнг болажонларни уларнинг ота-оналари хизмат қилаётган даргоҳ билан, унинг тарихи ва бугунги куни билан яқинроқ таништириш мақсадида «Божхона тарихи» музейига экскурсия уюштирилди. Музейдаги маълумот ва экспонатлар болалар учун ҳам тушунарли, ҳам зерикарли бўлмаслиги учун улар содда ва қизиқарли тарзда намойиш этилди.
Тадбир якунида болажонлар учун байрам дастурхони ёзилди.
Ҳ.ТАНГРИЕВ, ДБҚ Ахборот хизмати бош инспектори.