Корхона мулкий ҳуқуқлардан фойдаланиш ҳуқуқини бошқа шахсларга беришдан (асосий фаолият тури) роялти кўринишида, шунингдек мол-мулкни оператив ижарага беришдан даромад олади. Бунда роялтидан олинган даромадлар ижарадан олинган даромадлардан ошади.
Ижарага бериш асосий фаолият тури ҳисобланмаса, бу ҳолда мол-мулкни ижарага беришдан олинган даромадларни қайси счётга киритиш керак: 9030 ёки 9350?
Оператив ижара бўйича харажатлар ҳисобини қайси счётда юритиш лозим: 9430 ёки 2010?
– Сизнинг ҳолатда мол-мулкни оператив ижарага беришдан олинган даромадлар 9350-«Оператив ижарадан даромадлар» счётида, у бўйича харажатлар ҳисоби эса 9430-«Бошқа операцион харажатлар» счётида акс эттирилади.
Ижара операцияларини бухгалтерия ҳисобида акс эттириш тартиби Низом (АВ томонидан 1.06.2009 йилда 1961-сон билан рўйхатдан ўтказилган) билан белгиланган.
Мол-мулкни ижарага беришдан олинган даромадлар, агар уларнинг суммаси товарларни (ишларни, хизматларни) реализация қилишдан олинган даромадларнинг умумий суммасидан ортиқ бўлса, хизматларни реализация қилишдан олинган даромадлар деб эътироф этилади (Солиқ кодексининг 130-моддаси). Агар ҳисобот даврида асосий фаолият тури хизматлар деб эътироф этиладиган роялтидан олинган даромадлар бўлса, ижара бўйича даромадлар корхонанинг бошқа даромадлари таркибида 9350-«Оператив ижарадан даромадлар» счётида ҳисобга олинади (Йўриқноманинг 392-банди, АВ томонидан 23.10.2002 йилда 1181-сон билан рўйхатдан ўтказилган 21-сон БҲМСга 2-илова).
Оператив ижара шартномаси бўйича берилган асосий воситалар бўйича ҳисобланган эскириш суммалари, агар ижара асосий фаолият тури ҳисобланмаса, 9430-«Бошқа операцион харажатлар» счётининг дебетида қайд этилади (Низомнинг 30-банди «а» кичик банди).
Жавобни «Norma» МЧЖ экспертлари тайёрладилар.
