Давлат ташкилоти МЧЖ шаклидаги қўшма корхонанинг муассиси ҳисобланади (49%лик улушга эга). Ички ҳужжатларда МЧЖ ҚКнинг муассисларга муайян ҳисоботларни тақдим этиши назарда тутилмаган.
Муассис МЧЖ ҚКдан қандай ҳисоботлар, ҳужжатларни сўрашга ҳақли?
Б.Ибодуллаев, бош бухгалтер.
– МЧЖ муассиси жамият фаолияти тўғрисидаги барча ахборотни олишга ҳақли.
МЧЖ ташкил этилиши, фаолияти, бошқаруви тартиби «Масъулияти чекланган ҳамда қўшимча масъулиятли жамиятлар тўғрисида»ги Қонун билан тартибга солинади.
МЧЖ иштирокчиси қуйидагиларга ҳақлидир:
► Қонунда ва МЧЖнинг таъсис ҳужжатларида белгиланган тартибда жамиятнинг ишларини бошқаришда иштирок этиш;
► қонун ҳужжатларида ва МЧЖ таъсис ҳужжатларида белгиланган тартибда жамиятнинг фаолияти тўғрисида ахборот олиш ҳамда унинг бухгалтерия дафтарлари ва бошқа ҳужжатлари билан танишиш;
► фойдани тақсимлашда иштирок этиш (Қонуннинг 8-моддаси).
МЧЖнинг уставида жамият фаолиятининг йиллик натижалари тасдиқланадиган жамият иштирокчиларининг навбатдаги умумий йиғилишини ўтказиш муддати белгиланиши керак. Йиғилиш молия йили тугаганидан кейин кечи билан 6 ой ичида ўтказилиши керак (Қонуннинг 31-моддаси).
Бинобарин, МЧЖ фаолиятининг йиллик натижасини айнан муассислар кўриб чиқиб, тасдиқлашлари шарт.
Сабоҳат Султонова, «Norma» МЧЖ эксперти.