Лутфихон Маллабоева 25 йил муқаддам Қирғизистон Республикаси Ўш вилоятидан Ўзбекистонга келган. Шу заминда олий маълумотли бўлиб, шифокор сифатида узоқ йиллар хизмат қилди. Оила қурди, фарзанду набиралар кўрди. Бироқ Ўзбекистон фуқароси паспортига эга эмаслиги унинг армони эди. Бугун Лутфихон опанинг орзулари ушалди, унга Ўзбекистон Республикаси фуқаролик паспорти берилди.
Шу куни Лутфихон опа сингари яна 8 нафар юртдошимиз фуқаролик паспортига эга бўлди.
Тошкент шаҳар ҳокимлигида шу муносабат билан ташкил этилган тадбирда турли вазирлик ва идоралар вакиллари, фуқаролар ва журналистлар иштирок этди.
Тошкент шаҳар ҳокими мамлакатимизда фуқаролар ҳуқуқ ва эркинликлари, шахсий манфаатлари қонун билан кафолатлаб қўйилгани, ҳар бир фуқарога бериладиган паспорт Ўзбекистон Республикаси мулки бўлиб, унинг эгаси давлат муҳофазасида эканини таъкидлади. Президентимиз Шавкат Мирзиёевнинг 2018 йил 6 мартдаги «Ўзбекистон Республикаси фуқаролигига қабул қилиш тўғрисида»ги Фармонига асосан пойтахтимизда истиқомат қилиб, юртимиз тараққиётига ҳисса қўшиб келаётган бир гуруҳ юртдошларимиз фуқаролик паспортига эга бўлди.
– Оилам, фарзандларим ёнимда, тинч диёрда яшаяпман. Бир қарашда мендан бахтли аёл йўқ, – дейди Миробод туманидаги 1-оилавий поликлиника умумий амалиёт шифокори Лутфихон Маллабоева. – Шу заминда яшаб, уни жондан азиз билсам-да, фуқаролик паспортига эга бўлмаганим мени қийнар эди. Қариндошларим қўшни Қирғизистонда яшайди. Уларни йиллаб кўролмасдим. Хорижга чиқиш билан боғлиқ кўплаб муаммо ва қийинчиликлар бўлар эди. Ҳатто, ота-онамни сўнгги манзилга кузатаётганда ҳам вақтида етиб бора олмаганим армон бўлиб қолди. Яратганга шукр, бугун фуқаролик паспортини қўлимга олдим, сайлаш, сайланиш ҳуқуқига эга бўлдим. Бу ҳужжат орзуларим рўёби бўлиши билан бирга, катта масъулият ҳам юклайди. Юртимизда амалга оширилаётган ислоҳотларда фаол иштирок этиб, мамлакатимиз тараққиётига хизмат қиламан.
ЎзА асосида.
