Бугунги кунда божхоначилар божхона чегаралари орқали нақд хорижий валюталарнинг ноқонуний олиб ўтилиши олдини олиш борасида доимий сергак турибдилар.
2017 йил 20 ноябрь куни «Самарқанд-аэропорт» чегара божхона пости ходимлари амалдаги тартибларни қўпол равишда бузиб, нақд хорижий валюталарни ноқонуний йўл билан олиб чиқишга уринган божхона қоидабузарлигини фош қилишди. «Самарқанд–Санкт-Петербург» авиарейси билан учиб кетаётган М.Ҳайдаров (исм-шарифи ўзгартирилган) шахсий кўрикдан ўтказилганда йўловчи божхона декларациясида кўрсатилмаган ва оғзаки сўровлар вақтида маълум қилинмаган нақ 9 420 АҚШ доллари ва 325 880 Россия рублини багаж сумкасининг ичига яширгани аниқланди.
Ўзбекистон Республикаси ТИФ Миллий банки Самарқанд бўлимининг экспертиза далолатномасига кўра, М.Ҳайдаровдан олинган хорижий банкноталар ҳақиқий деб топилиб, уларнинг умумий миқдори қарийб 121 млн сўмни ташкил этган.
Ҳозирда мазкур ҳолат бўйича қонунбузарга нисбатан Жиноят кодексининг 182-моддаси 2-қисми «а» банди билан жиноят иши қўзғатилиб, тергов ва суриштирув ишлари олиб борилмоқда.
Эслатиб ўтамиз, Божхона кодексининг 240-моддасига биноан Ўзбекистон Республикасининг нақд миллий валютаси ва нақд чет эл валютаси олиб кирилиши ва олиб чиқилиши устидан назорат жисмоний шахслар божхона чегарасини кесиб ўтаётганда божхона органлари томонидан амалга оширилади.
Амалдаги тартибларга мувофиқ, республикамизда резидентларга 2 000 АҚШ доллари эквивалентидаги нақд хорижий валюталарни йўловчи божхона декларациясида ёзма қайд этиш шарти билан эркин олиб чиқиб кетишга рухсат этилади. Бундан ортиқ миқдордаги нақд валюталарни олиб чиқиш учун ваколатли банклар ёки Марказий банкнинг ўрнатилган тартибдаги рухсатномаси талаб этилади.
Норезидентларга эса Ўзбекистонга кириб келаётганда ўзи билан олиб келган ҳамда божхонага тақдим этилган йўловчи божхона декларациясида қайд этилган миқдордаги хорижий валютани олиб чиқишга рухсат этилади.
Самарқанд вилояти божхона бошқармаси Ахборот хизмати.
