Тадбиркорлик субъектлари – импортёрлар томонидан Ўзбекистон Республикасининг божхона ҳудудига бож тўловлари бўйича имтиёзлар қўлланган ҳолда олиб кириладиган товарларнинг божхона қийматини тасдиқлаш тартиби тўғрисидаги низомга мувофиқ, ушбу имтиёзлар олиб кирилаётган товарнинг тасдиқланган қийматига тақдим этилади.
Импортёр божхона тўловлари бўйича имтиёзларни қўллаган ҳолда олиб кирилаётган товарларнинг божхона қийматини тасдиқлаш учун Ўзбекистон божхона органларига «Эркин муомала учун чиқариш» режимига божхона расмийлаштируви пайтида экспорт божхона юк декларациясини ёки унинг ўрнини босувчи бошқа ҳужжатни ва Ўзбекистон Республикасининг божхона ҳудудигача қилинган харажатларни (қиймат ва тўловларни) тасдиқловчи бошқа ҳужжатларни тақдим этади.
ЭБЮД (ёки унинг ўрнини босувчи бошқа ҳужжат) тақдим этилмаган тақдирда, божхона тўловлари бўйича имтиёзлар берилмайди. Бироқ ушбу норма Ўзбекистон Республикаси томонидан тузилган шартномалар (битимлар) доирасида олиб кирилаётган товарларга нисбатан татбиқ этилмайди. Шу сабабли божхона постида вақти-вақти билан келишмовчиликлар юзага келади.
Лозим даражада расмийлаштирилган СТ-1 сертификати мавжуд бўлганда ва 18.10.2011 йилдаги Эркин савдо зонаси тўғрисидаги шартноманинг бошқа шартлари бажарилганда, ушбу Шартнома доирасида Ўзбекистонга олиб кирилаётган товарлар бўйича импорт божхона божини тўлашга доир имтиёзни қўллаш учун экспорт божхона юк декларациясини тақдим этиш зарурми?
С.Баришева.
– Ҳақиқатан ҳам, Шартнома Тарафи бошқа Тарафнинг божхона ҳудудида ишлаб чиқарилган товарнинг импортига божхона божларини ва божхона божларига эквивалент бўлган бошқа тўловларни қўлламайди (18.10.2011 йилдаги Шартноманинг 2-моддаси 1-банди).
Агар Ўзбекистон Республикасининг халқаро шартномасида божхона тўғрисидаги қонун ҳужжатларида назарда тутилганидан бошқача қоидалар белгиланган бўлса, халқаро шартнома қоидалари қўлланилади (БКнинг 2-моддаси).
Тегишинча, тилга олинган халқаро Шартнома асосида импорт божхона божини тўлаш бўйича имтиёзларни қўллаш учун экспорт БЮДни тақдим этиш шарт эмас. Шу сабабли тўғри расмийлаштирилган СТ-1 сертификатини тақдим этишда ҳеч қандай келишмовчиликлар юзага келмаслиги керак.
«Божхона» бўлимини махсус мухбиримиз Гулнора АБДУНАЗАРОВА олиб боради.
