Россия Давлат Думасига кўп квартирали уйларда қўшниларнинг ҳуқуқларига риоя қилиш тўғрисидаги қонун лойиҳаси киритилди. Унга мувофиқ мулкдор томонидан унга тегишли бўлган уй-жойга қабул қилинган ҳар қандай шахслар тунги вақтда тинчликни сақлаш, ёнғин хавфсизлиги, санитария-гигиена ва экологик талабларга амал қилишни таъминлашлари лозим.
Экспертларнинг фикрига кўра, кўпинча кишилар квартирани ижарага бериб, бунинг учун ҳақ олади, бироқ ижарачи ёки квартирантлар бу ерда нималар қилиши уларни қизиқтирмайди. Натижада қўшниларнинг ўзи шовқин-суронни бостиришга мажбур бўладилар. Полиция чақирилгунга қадар қўшнилар тинчлигини бузувчилар биноларни тарк этишлари мумкин ва озор кўрган томон ўз ҳуқуқларини тиклашда ожиз қолади.
Янги қонун лойиҳасига биноан тинчликни бузганлик учун ушбу талабни бузган ижарачи ёки квартирант эмас, балки айнан квартира мулкдори жавоб беради. Яъни ўз квартирасига одам қўяр экан, уй эгасидан анчайин зийрак бўлиш талаб қилинади. Ижарачилар кўп квартирали уйларда қабул қилинган талабларни бузгудек бўлса, уй хўжайинига жарима талабномалари кела бошлайдики, бу пулларни унинг ўзи «шовқин шайдолари»дан ундириб олаверади. Бундай вазиятларда квартирадаги шовқин-сурон хусусидаги аризани яқин қўшниларнинг бир нечтаси тасдиқлаши, бошқарув компанияси эса шовқин даражаси тўғрисида далолатнома тузиши керак.
Экспертларнинг фикрига кўра, бу қийин иш эмас. Қўшнини огоҳлантириш учун батареяни тақиллатиш ёки жанжаллашишнинг ўрнига БКнинг диспетчерлик хизматига қўнғироқ қилинса, унинг ходимлари шовқиннинг даражасини ўлчашади-ю, дарҳол далолатнома тузишади. Шундан кейин Роспотребнадзорга шикоят қилинса, бу ташкилот судга даъво киритади ва мулкдорга жарима солинади.
Қонун лойиҳаси қабул қилингудек бўлса, тунги вақтда қурувчилар билан бўладиган можаролар учун ҳам квартира мулкдори жавоб беради. У кечаси ўз квартирасидаги тинчлик учун жавобгар бўлади. Кўп квартирали уйда тинчликни бузишга йўл қўйилмайдиган вақт оралиғи Россия Федерацияси субъектининг қонуни билан белгиланади.
«Тинчлик» деганда қонунчилик ташаббуси муаллифлари ҳаракатлар манбаи турар жой ёки нотурар жой биноларида бўлган бинодан ташқарида аниқ эшитилиб турадиган ёхуд манбаи турар ёинки нотурар жой бўлган ерларда тебранишни унинг ташқарисида аниқ сезиладиган ҳаракатлар содир этилишини назарда тутишган. Инсон турмуш тарзининг одатдаги товушлари (бола йиғиси, муҳандислик тизимларидаги сув товуши, оддий юрганда қадам товуши ва бошқалар) тинчликни бузиш деб ҳисобланмайди. Шунингдек фуқароларнинг шахсий ва жамоат хавфсизлигини таъминлаш билан боғлиқ қутқарув, авария-тиклаш ва бошқа ишлар шовқин деб ҳисобланмайди.
Квартирада таъмирлаш ва бошқа ишлар олиб борилганда қонун лойиҳаси мулкдор зиммасига умумий фойдаланиш имконияти бўлган жойларда (уй йўлакларининг эълонлар учун мўлжалланган лавҳлари ёки кўп квартирали уй жойлашган ер участкалари доирасида) эълон жойлаштирган ҳолда қўшниларни хабардор қилишни юклайди. Мулкдор, шунингдек, кўп квартирали уйнинг умумий мол-мулки, шу жумладан муҳандислик коммуникациялари ёки мулкдор томонидан ижарага қўйилганлар турар жой ва нотурар жойларда фуқароларга зарар етказишига йўл қўйилмайди. Зарар етказилган тақдирда, мулкдор зарарни қоплаш борасида ижарачилар ёки квартирантлар билан бирга солидар жавобгар бўлади. Бундай мажбуриятларни мунтазам (бир ой мобайнида икки мартадан кўп) бузганлик учун мулкдор маъмурий жавобгарликка тортилиши ҳам мумкин.
Масалага бундай ёндашув кўп квартирали уйларда яшаш шароитлари янада яхшиланишига умид бағишлайди, шу билан бирга қўшничилик ҳуқуқи шаклланишига туртки беради ҳамда умуман қўшнилараро муносабатлар маданиятини юқори поғонага кўтаради. Қонун лойиҳаси ташаббускорлари лойиҳада баён этилган ҳуқуқбузарликлар учун маъмурий жарималарга доир таклифларни киритишмоқчи.
