Бўнак тўловлари: уй эгалари тежаш учун нималарни билиши керак
ККУда яшовчиларнинг кўпчилиги ўтган йили умумий мол-мулкни сақлаш учун бўнак тўлаганлар ва тариф оширилиши муносабати билан қўшимча тўлов талаб қилиниши муаммосига дуч келдилар. Бошқарув органлари буни 2024 йил 1 майдан республикада мажбурий минимал тарифлар жорий этилганлиги, бадаллар ва тўловлар ошишига сабаб бўлганлиги билан асосламоқда. Фуқаролар бу талабнинг қонунийлигига қизиқмоқдалар. Улар қўшни БК ёки ХУМШ мисолида бўнак тўловлари қайта ҳисоб-китоб қилинмаслигини келтирмоқдалар. «Кўп квартирали уйларни бошқариш тўғрисида»ги Қонуннинг (Қонун) 16-моддасига ҳавола қилмоқдалар, унга мувофиқ умумий мол-мулкни сақлаш, ундан фойдаланиш ва уни таъмирлаш ҳамда ККУга туташ ер участкасини ободонлаштириш учун жойлар мулкдорлари мажбурий бадалларининг ёки тўловларининг миқдори умумий йиғилиш қарори билан белгиланади. «Агар биз, мулкдорлар, бадал ёки тўлов миқдорини тасдиқласак ва бир йил учун олдиндан тўласак, нега биздан қўшимча тўлов талаб қилинмоқда? Бу масала қонунчиликда қандай тартибга солинади?» – деб сўрамоқдалар уйда яшовчилар.