Norma.uz
Газета Норма маслахатчи / 2021 год / № 49 / Расмий ҳужжатлар

ЎзР Президенти ҳузуридаги Лойиҳа бошқаруви миллий агентлиги директорининг «Крипто-биржалар фаолиятини лицензиялаш тартиби тўғрисидаги Низомнинг 1а-иловасига ўзгартириш ва қўшимчалар киритиш ҳақида»ги буйруғи

 

Идоравий меъёрий-ҳуқуқий ҳужжат

 

Ўзбекистон Республикаси Адлия вазирлиги томонидан 2021 йил 22 ноябрда рўйхатдан ўтказилди,
рўйхат рақами 3127-6

Ўзбекистон Республикаси Президентининг 2018 йил 3 июлдаги ПҚ-3832-сон «Ўзбекистон Республикасида рақамли иқтисодиётни ривожлантириш чора-тадбирлари тўғрисида»ги ва 2018 йил 2 сентябрдаги ПҚ-3926-сон «Ўзбекистон Республикасида крипто-биржалар фаолиятини ташкил этиш чора-тадбирлари тўғрисида»ги қарорларига мувофиқ крипто-активлар айланмаси соҳасини янада ривожлантириш учун қулай шарт-шароитлар яратиш ҳамда Ўзбекистон Республикаси ҳудудида крипто-активларнинг яширин айланмасини камайтириш мақсадида буюраман:

1. Ўзбекистон Республикаси Президенти ҳузуридаги Лойиҳа бошқаруви миллий агентлигининг 2019 йил 21 январдаги 16-сон буйруғи (рўйхат рақами 3127, 2019 йил 22 январь) (Қонун ҳужжатлари маълумотлари миллий базаси, 23.01.2019 й., 10/19/3127/2525-сон) билан тасдиқланган Крипто-биржалар фаолиятини лицензиялаш тартиби тўғрисидаги низомнинг 1а-иловасига иловага мувофиқ ўзгартириш ва қўшимчалар киритилсин.

2. Ушбу буйруқ расмий эълон қилинган кундан эътиборан кучга киради.

Директор

ЛИ Д.Р.

Тошкент ш.,

2021 йил 11 ноябрь

34-сон.

Буйруққа

ИЛОВА

КРИПТО-БИРЖАЛАР ФАОЛИЯТИНИ ЛИЦЕНЗИЯЛАШ ТАРТИБИ ТЎҒРИСИДАГИ НИЗОМНИНГ 1а-ИЛОВАСИГА КИРИТИЛАЁТГАН ЎЗГАРТИРИШ ВА ҚЎШИМЧАЛАР

1. 2-бандда:

ўн иккинчи хатбоши қуйидаги таҳрирда баён этилсин:

«токен – маълум бир активга бўлган мажбуриятни ёки мулк ҳуқуқини тасдиқлаш учун мўлжалланган, тақсимланган маълумотлар реестридаги ҳисоб бирлиги. Токен фаолиятга молиявий маблағлар ва инвестицияларни жалб қилиш мақсадида Ўзбекистон Республикаси ҳудудида рўйхатдан ўтган юридик шахслар ёки якка тартибдаги тадбиркорлар томонидан чиқарилади;»;

қуйидаги мазмундаги ўн учинчи–ўн еттинчи хатбошилар билан тўлдирилсин:

«токенни чиқариш – токеннинг фуқаролик ҳуқуқларининг объекти сифатида пайдо бўлишига қаратилган ташкилий-техник тадбирлар;

токенни жойлаштириш – токеннинг крипто-биржаларда у билан крипто-биржа савдоларини амалга ошириш мақсадида жойлаштириш;

токенни чиқаришни рўйхатдан ўтказиш – чиқарилган токенларни крипто-биржалар томонидан Ўзбекистон Республикаси ҳудудида муомалага чиқариш мақсадида рўйхатдан ўтказиш;

токенни муомалага киритиш – токенларни сотиб олиш, сотиш ҳамда бошқа крипто-активларга алмаштиришга қаратилган операцияларни амалга ошириш;

таъминланмаган токен – бирор-бир моддий ва (ёки) бошқа мулк билан таъминланмаган токен;»;

ўн учинчи–ўттизинчи хатбошилар тегишли равишда ўн саккизинчи–ўттиз бешинчи хатбошилар деб ҳисоблансин;

йигирма иккинчи хатбошидаги «крипто-актив ва токенларни» деган сўзлардан кейин «миллий ва (ёки)» деган сўзлар билан тўлдирилсин;

қуйидаги мазмундаги йигирма олтинчи хатбоши билан тўлдирилсин:

«токенларни чиқариш, чиқаришни рўйхатдан ўтказиш, жойлаштириш ва муомалага киритиш;»;

йигирма олтинчи–ўттиз бешинчи хатбошилар тегишли равишда йигирма еттинчи–ўттиз олтинчи хатбошилар деб ҳисоблансин.

2. 3-бандда:

қуйидаги мазмундаги саккизинчи–ўн учинчи хатбошилар билан тўлдирилсин:

«крипто-биржада токенларни чиқариш ва жойлаштиришга қаратилган фаолиятни амалга оширадиган юридик шахсларнинг раҳбарлари, якка тартибдаги тадбиркорлар ҳамда уларнинг вакилларини ушбу Қоидаларнинг 11-бандида назарда тутилган шахслар тоифасига кириш ёки кирмаслигини аниқлашга;

токенларни таъминлаш учун киритилган моддий ва (ёки) бошқа мулкнинг ҳақиқатда мавжудлигини текширувдан ўтказилишини таъминлашга;

қуйидагиларни инобатга олган ҳолда токенларни чиқариш, чиқаришни рўйхатдан ўтказиш, жойлаштириш ва муомалага киритиш тартибини тасдиқлашга:

токенларни жойлаштириш учун жалб этилиши режалаштирилган маблағларнинг камида 10 фоиз миқдорини миллий ва (ёки) чет эл валютасида крипто-биржанинг ҲККПдаги алоҳида виртуал ҳисобрақамига қўйиш;

токенларни крипто-биржага жойлаштирган шахснинг ҲККПдаги алоҳида виртуал ҳисобрақамидаги маблағлар ҳисобидан шартнома мажбуриятларида назарда тутилган ҳолларда ва миқдорда унинг токенларини сотиб олинишини таъминлаш;

чиқарилган токенларнинг номланиши ёки рамзларида «давлат», «давлат томонидан таъминланган», «давлат томонидан қўллаб-қувватланган», «Ўзбекистон», «ўзбек», «миллий», «сўм (UZS)» ҳамда Ўзбекистон Республикаси шаҳарларининг номларини тўлиқ ёки қисқартирилган шаклда, шунингдек уларнинг бирликларидан фойдаланган ҳолда, исталган тилда ва ҳар қандай шаклда ишлатишни тақиқлаш;»;

саккизинчи хатбошидаги «қонун» деган сўз «қонунчилик» деган сўз билан алмаштирилсин;

саккизинчи хатбоши тегишли равишда ўн тўртинчи хатбоши деб ҳисоблансин.

3. 5-банд қуйидаги таҳрирда баён этилсин:

«5. Ўзбекистон Республикасининг резидентлари крипто-биржаларда:

крипто-активлар ва токенлар билан крипто-биржа савдоларининг барча турларини миллий валютада;

Ўзбекистон Республикасининг норезидентлари билан фақатгина крипто-активлар ва токенларни сотишга доир операцияларни хорижий валютада амалга ошириш ҳуқуқига эга.

Сотиб олиш объекти сифатида крипто-активларни танлаш ва бу танловнинг тегишли оқибатлари сотиб олувчининг ўз таваккалчилигидир.».

4. 6-банд қуйидаги мазмундаги иккинчи ва учинчи хатбошилар билан тўлдирилсин:

«Ўзбекистон Республикаси ҳудудида крипто-биржалар томонидан таъминланмаган токенларни чиқариш, чиқаришни рўйхатдан ўтказиш ва жойлаштириш тақиқланади.

Крипто-биржа таъминланмаган токенларни чиқарганлиги, чиқаришни рўйхатдан ўтказганлиги, жойлаштирганлиги ва муомалага киритганлиги учун қонунчилик ҳужжатларига мувофиқ жавобгарликка тортилади.».

*Ушбу буйруқ Қонун ҳужжатлари маълумотлари миллий базасида (lex.uz) эълон қилинган ва 22.11.2021 йилдан кучга кирди.

Прочитано: 201 раз(а)

Если Вы заметили ошибку, выделите фрагмент текста, содержащий ошибку, и нажмите Ctrl+Enter.
Сайт разработан в ООО «NORMA», зарегистрирован в Узбекском агентстве по печати и информации 01.06.2018г.
Регистрационное свидетельство № 0406.
Адрес: Узбекистан, 100105, г. Ташкент, Мирабадский р-н, ул. Таллимаржон, 1/1.
Тел. (998 78) 150-11-72. Call-центр:1172. E-mail: admin@norma.uz
Копирование материалов сайта без согласования с администрацией ресурса запрещено.
© ООО «NORMA», 2007-2024 г. Все права защищены.
18+   Яндекс.Метрика