- Мамлакатимизда давлат органларининг қанча веб-сайти мавжуд?
- Электрон хизматлар сони 1 244 тага етган
Пойтахтимиздаги Алоқа тарихи музейида давлат органлари расмий веб-сайтларини ва электрон давлат хизматларини кўрсатиш тартибини такомиллаштиришга бағишланган семинар ўтказилди.
Олий Мажлис Қонунчилик палатасининг Ахборот ва коммуникация технологиялари масалалари қўмитаси ҳамда Ахборот технологиялари ва коммуникацияларини ривожлантириш вазирлиги ҳамкорлигида ташкил этилган тадбирда депутатлар, давлат органлари веб-сайтлари ва ахборот хизматлари ходимлари иштирок этди.
Парламент қуйи палатасининг Ахборот ва коммуникация технологиялари масалалари қўмитаси раиси И.Абдуллаев, ахборот технологиялари ва коммуникацияларини ривожлантириш вазирининг биринчи ўринбосари А.Файзуллаев ва бошқалар Президентимиз раҳнамолигида фуқароларнинг сўз ва ахборот олиш эркинлиги, ахборот хавфсизлигини таъминлаш, ахборот-коммуникация технологияларини жадал ривожлантириш масалаларига устувор аҳамият қаратилаётганини таъкидлади.
Мамлакатимизда яратилган мустаҳкам қонунчилик асослари жамият ҳаётининг барча жабҳаларида кечаётган ислоҳотлардан халқимизни ўз вақтида хабардор этиб бориш, жисмоний ва юридик шахсларнинг ахборотдан фойдаланишини, айниқса, давлат органлари фаолиятидан аҳолининг хабардорлигини таъминлаш имконини бермоқда. Бугунги кунда давлат ҳокимияти ва бошқаруви органларининг 114 та веб-сайти мавжуд бўлиб, уларнинг 90 таси фойдаланишда қулайлик яратиш ва замонавий технологик талабларни инобатга олган ҳолда ўзларининг мобиль шаклларини жорий этган.
Давлат органлари фаолиятининг очиқлиги ва шаффофлигини, кўрсатилаётган хизматлар тезкорлигини таъминлаш йўлида амалга оширилаётган ишларнинг ҳуқуқий асоси «Электрон ҳукумат тўғрисида»ги Қонунда мустаҳкамлаб қўйилган. Тадбирда яқинда кучга кирадиган мазкур Қонунни амалиётда қўллаш, унинг нормаларига мувофиқ веб-сайтлар фаолиятини янада такомиллаштириш, электрон давлат хизматлари кўрсатишни тартибга солиш масалаларига эътибор қаратилди.
Давлат органларининг расмий веб-сайтлари орқали кўрсатилаётган электрон давлат хизматларининг сони айни пайтда 1 244 тага етган. Семинарда электрон давлат хизматларини кўрсатиш тартибини такомиллаштириш, ортиқча маъмуриятчиликни бартараф этиш, давлат органлари билан келишиш жараёни ва аризачи томонидан тақдим этиладиган ҳужжатлар сонини қисқартириш, идоралараро электрон шаклдаги ўзаро ҳамкорликни оптималлаштириш масалалари тўғрисида фикрлашилди.
ЎзА материали асосида.
