Сурхондарё вилояти тадбиркорларининг фаолияти билан яқиндан танишиш ҳамда уларни безовта қилган масалаларни атрофлича ўрганиш мақсадида вилоят божхона бошқармасининг бир гуруҳ мутахассислари «JARQO'RG'ON PARRANDA» МЧЖда бўлдилар.
– Корхонамиз таъмирланиб бўлгач, 1,3 млн АҚШ долларидан ошиқроқ маблағ эвазига паррандаларни сақлайдиган ускуналар келтириб ўрнатилди, – дейди паррандачилик бўйича бош мутахассис Қарши Шарипов. – Яқин кунларда 62 мингдан ортиқ жўжа олиб келишни мўлжаллаяпмиз. Жўжалар етилиб тухумга киргач, корхонада кунига 250 мингтадан тухум олинади.
Келтирилган технологик ускуналар бир неча соат ичида божхона расмийлаштирувидан ўтказилди. Мазкур технологик ускуналарни мамлакатимизга келтиришда амалдаги тартибларга риоя этилган ҳолда импорт божхона божи ва қўшилган қиймат солиғидан 763,5 млн сўмлик имтиёзлар берилди. Тадбиркор таъкидлаганидек, имтиёзлар туфайли бўшаган маблағлар корхона фаолиятини кенгайтиришга йўналтирилади.
Сурхондарё вилояти божхона бошқармаси Ахборот хизмати.
